ਜੀ ਐਸ ਜੀ ਐਕਡਮੀ ਦਾ ਸਾਲਾਨਾ ਸਭਿਆਚਾਰਕ ਕੈਂਪ ਧੂਮ ਧੜੱਕੇ ਨਾਲ ਸ਼ੁਰੂ

500 ਤੋਂ ਵਧੇਰੇ ਬੱਚੇ ਲੈ ਰਹੇ ਨੇ ਮਾਹਿਰ ਕੋਚਾਂ ਤੋਂ ਵੱਖ ਵੱਖ ਕਲਾਵਾਂ ਬਾਰੇ ਸਿਖਲਾਈ
ਫਰਿਜਨੋ/ਬਿਊਰੋ ਨਿਊਜ਼:
ਜੀ ਐਸ ਜੀ ਐਕਡਮੀ ਫਰਿਜ਼ਨੋਂ ਦਾ ਸਾਲਾਨਾ ਸਭਿਆਚਾਰਕ ਕੈਂਪ ਪੰਜਾਬੀ ਸਕੂਲ ਫਰਿਜਨੋ ਦੀਆਂ ਗਰਾਊਂਡਾਂ ਵਿਚ ਧੂਮ ਧੜੱਕੇ ਨਾਲ ਸ਼ੁਰੂ ਹੋ ਚੁੱਕਾ ਹੈ ਜਿਸ ਵਿੱਚ 500 ਤੋਂ ਵਧੇਰੇ ਬੱਚੇ ਭਾਗ ਲੈ ਰਹੇ ਹਨ। ਇਸ ਕੈਂਪ ਲਈ ਮਾਪਿਆਂ ਤੇ ਬੱਚਿਆਂ ਵਿਚ ਭਾਰੀ ਉਤਸ਼ਾਹ ਵੇਖਣ ਨੂੰ ਮਿਲ ਰਿਹਾ ਹੈ।
ਡਾ. ਦਲਜਿੰਦਰ ਸਿੰਘ ਜੌਹਲ ਦੀ ਅਗਵਾਈ ਵਿਚ 40 ਕੋਚਾਂ ਦਾ ਕਾਫ਼ਲਾ ਬੱਚਿਆਂ ਨੂੰ ਵੱਖੋ ਵੱਖਰੇ ਗਰੁੱਪਾਂ ਵਿਚ ਕਲਾਂ ਦੀਆਂ ਬਾਰੀਕੀਆਂ ਤੋਂ ਜਾਣੂ ਕਰਵਾ ਰਿਹਾ ਹੈ। ਇਹ ਕੈਂਪ ਹਰ ਵਰ੍ਹੇ ਦੀ ਤਰ੍ਹਾਂ 15 ਦਿਨ ਚੱਲੇਗਾ ਅਤੇ 30 ਜੁਲਾਈ ਨੂੰ ਸਾਰੇ ਹੀ ਸਿਖਿਆਰਥੀ ਰੋਇੰਰਿੰਗ ਪਾਰਕ ਵਿਖੇ ਹੋਣ ਵਾਲੇ ਅੰਤਰ ਰਾਸ਼ਟਰੀ ਯੁਵਕ ਮੇਲੇ ਵਿਚ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰਨਗੇ।
ਪਰਮਜੀਤ ਸਿੰਘ ਧਾਲੀਵਾਲ (559-351-9465) ਵਲੋਂ ਲਿਖਤੀ ਤੌਰ ਉੱਤੇ ਦਿੱਤੀ ਜਾਣਕਾਰੀ ਅਨੁਸਾਰ 30 ਜੁਲਾਈ ਸ਼ਨਿਚਰਵਾਰ ਨੂੰ ਹੋਣ ਵਾਲੇ ਅੰਤਰ ਰਾਸ਼ਟਰੀ ਯੂਨੀਅਨ ਭੰਗੜੇ ਮੁਕਾਬਲੇ ਵਿਚ ਅਮਰੀਕਾ ਅਤੇ ਕੈਨੇਡਾ ਦੀਆਂ ਚੋਟੀ ਦੀਆਂ 14 ਟੀਮਾਂ ਹਿੱਸਾ ਲੈਣਗੀਆਂ। ਹਰ ਸਾਲ ਦੀ ਤਰ੍ਹਾਂ ਮੁਕਾਬਲਾ ਬਹੁਤ ਫਸਵਾਂ ਹੋਵੇਗਾ।
ਪ੍ਰਬੰਧਕੀ ਬੋਰਡ ਵੱਲੋਂ ਸਮੁੱਚੇ ਪੰਜਾਬੀ ਭਾਈਚਾਰੇ, ਸੰਸਥਾਵਾਂ ਅਤੇ ਮਾਪਿਆਂ ਨੂੰ ਪਰਿਵਾਰਾਂ ਸਮੇਤ ਪਹੁੰਚਣ ਦੀ ਬੇਨਤੀ ਕੀਤੀ ਜਾਂਦੀ ਹੈ। ਸਭਨਾਂ ਨੂੰ ਖੁਲ੍ਹਾ ਸੱਦਾ ਹੀ ਕਿ ਸਾਰੇ ਰਲ ਚਲ ਮਿਲ ਕੇ ਚਲ ਰਹੇ ਕੈਂਪ ਦੌਰਾਨ ਅਤੇ ਯੂਥ ਫੈਸਟੀਵਲ ਦੌਰਾਨ ਪਹੁੰਚ ਕੇ ਬੱਚਿਆਂ ਨੂੰ ਆਸ਼ੀਰਵਾਦ ਦੇਈਏ। ਇਸ ਕੈਂਪ ਜਾਂ ਮੇਲੇ ਦੀ ਕੋਈ ਫੀਸ ਨਹੀਂ ਹੈ। ਕੈਂਪ ਦੌਰਾਨ ਹਰ ਰੋਜ਼ ਬੱਚਿਆਂ ਨੂੰ ਬਹੁਤ ਹੀ ਪੌਸ਼ਟਿਕ ਭੋਜਨ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ।
ਵਧੇਰੇ ਜਾਣਕਾਰੀ ਲਈ ਗੁਰਦੀਪ ਸ਼ੇਰਗਿੱਲ ਫੋਨ 559-349-1481 ਜਾਂ ਉਦੈਦੀਪ ਸਿੱਧੂ ਫੋਨ 559-942-6068 ਤੇ ਸੰਪਰਕ ਕਰੋ।

The post ਜੀ ਐਸ ਜੀ ਐਕਡਮੀ ਦਾ ਸਾਲਾਨਾ ਸਭਿਆਚਾਰਕ ਕੈਂਪ ਧੂਮ ਧੜੱਕੇ ਨਾਲ ਸ਼ੁਰੂ appeared first on Quomantry Amritsar Times.