ਪੰਜਾਬੀ ਲਿਟਰੇਰੀ ਐਂਡ ਕਲਚਰਲ ਸੁਸਾਇਟੀ ਦੀ ਮੀਟਿੰਗ ਨਾਵਲਕਾਰ ਫ਼ਰਜ਼ੰਦ ਅਲੀ ਨੂੰ ਸਮੱਰਪਿਤ

ਪੰਜਾਬੀ ਦੇ ਤ੍ਰੈਮਾਸਿਕ ‘ਵਾਹਗਾ’ ਦਾ ਪਲੇਠਾ ਅੰਕ ਰਲੀਜ਼
ਨਿਊਯਾਰਕ/ਬਿਊਰੋ ਨਿਊਜ਼:
ਨਿਊਯਾਰਕ ਦੀ ਤਿੰਨ ਦਹਾਕੇ ਪੁਰਾਣੀ ਵੱਕਾਰੀ ਸੰਸਥਾ ‘ਪੰਜਾਬੀ ਲਿਟਰੇਰੀ ਐਂਡ ਕਲਚਰਲ ਸੁਸਾਇਟੀ, ਨਿਊਯਾਰਕ’ ਦੀ ਮਹੀਨਾਵਾਰ ਮੀਟਿੰਗ ਪੰਜਾਬੀ ਦੇ ਹੋਣਹਾਰ ਨਾਵਲਕਾਰ ਫ਼ਰਜ਼ੰਦ ਅਲੀ ਨੂੰ ਸਮੱਰਪਿਤ ਕੀਤੀ ਗਈ। ਇਸ ਵਿਚ  ਨਵੇਂ ਸ਼ੁਰੂ ਹੋਏ ਪੰਜਾਬੀ ਦੇ ਤ੍ਰੈਮਾਸਿਕ ਮੈਗਜ਼ੀਨ ‘ਵਾਹਗਾ’ ਦਾ ਪਲੇਠਾ ਅੰਕ ਰਲੀਜ਼ ਕੀਤਾ ਗਿਆ।
ਮੀਟਿੰਗ ਦੀ ਪ੍ਰਧਾਨਗੀ ਨਿਊਯਾਰਕ ਵਿਚ ਵਸਦੇ ਉਰਦੂ ਦੇ ਪ੍ਰਸਿੱਧ ਸ਼ਾਇਰ ਵਾਸਿਫ਼ ਹੁਸੈਨ ਵਾਸਿਫ਼ ਨੇ ਕੀਤੀ। ਸਭ ਤੋਂ ਪਹਿਲਾਂ ਰਾਣੀ ਨਗਿੰਦਰ ਨੇ ਆਏ ਸਾਹਿਤਕਾਰਾਂ ਨੂੰ ‘ਜੀ ਆਇਆਂ’ ਕਿਹਾ। ‘ਵਾਹਗਾ’ ਦੇ ਸਹਾਇਕ ਸੰਪਾਦਕ ਦਲਜੀਤ ਮੋਖਾ ਨੇ ਇਸ ਮੈਗਜ਼ੀਨ ਦੀ ਸੰਪਾਦਨਾ ਬਾਰੇ ਚੰਦ ਸ਼ਬਦ ਕਹੇ। ਰਲੀਜ਼ ਕਰਨ ਦੀ ਰਸਮ ਵਾਸਿਫ਼ ਹੁਸੈਨ ਵਾਸਿਫ਼ ਨੇ ਅਦਾ ਕੀਤੀ। ਸੁਰਿੰਦਰ ਸੋਹਲ ਨੇ ਨਾਵਲਕਾਰ ਫ਼ਰਜ਼ੰਦ ਅਲੀ ਦੇ ਨਾਵਲ ‘ਭੁੱਬਲ’ ਬਾਰੇ ਕੁਝ ਸ਼ਬਦ ਕਹੇ। ਸ਼ਾਇਰ ਤਰਲੋਕਬੀਰ ਨੇ ‘ਭੁੱਬਲ’ ਨਾਵਲ ਦੀ ਹੋਈ ਭਰਪੂਰ ਚਰਚਾ ਬਾਰੇ ਜ਼ਿਕਰ ਕੀਤਾ।
ਵਾਸਿਫ਼ ਹੁਸੈਨ ਵਾਸਿਫ਼ ਨੇ ਆਪਣੀ ਪੁਸਤਕ ‘ਤਸਲਸੁਲ ਜ਼ਾਤ ਕਾ’ ਵਿਚੋਂ ਖ਼ੂਬਸੂਰਤ ਗ਼ਜ਼ਲਾਂ ਨਾਲ ਸ਼ਾਮ ਨੂੰ ਕਾਵਿਮਈ ਬਣਾ ਦਿੱਤਾ। ਤਰਲੋਕਬੀਰ, ਸੁਰਿੰਦਰ ਸੋਹਲ, ਦਲਜੀਤ ਮੋਖਾ, ਰਾਣੀ ਨਗਿੰਦਰ, ਅਸ਼ੋਕ ਸਿੰਘ ਅਤੇ ਜੱਸੀ ਢਿਲੋਂ ਨੇ ਆਪਣੀਆਂ ਪੰਜਾਬੀ, ਹਿੰਦੀ ਅੰਗਰੇਜ਼ੀ  ਨਜ਼ਮਾਂ ਸੁਣਾਈਆਂ।
ਅਗਲਾ ਦੌਰ ਕਹਾਣੀਆਂ ਦਾ ਸੀ। ਸੁਰਿੰਦਰ ਸੋਹਲ ਨੇ ਆਪਣੀ ਤਾਜ਼ਾ ਕਹਾਣੀ ‘ਸੂਰਜ ਵੱਲ ਦੇਖਦਾ ਆਦਮੀ’ ਪੜ੍ਹੀ। ਮੁਮਤਾਜ਼ ਹੁਸੈਨ ਨੇ ਉਰਦੂ ਕਹਾਣੀ ‘ਖੱਟ ਨਲੀ ਖੱਟ ਤਾਰ’ ਪੜ੍ਹ ਕੇ ਵਾਹਵਾ ਖੱਟੀ। ਰਾਣੀ ਨਗਿੰਦਰ ਨੇ ਸਮਲਿੰਗੀਆਂ ਦੇ ਦੁਖਾਂਤ ਨੂੰ ਪੇਸ਼ ਕਰਦੀ ਕਹਾਣੀ ‘ਗੁਲਾਬੀ ਤਿਕੋਣ’ ਪੜ੍ਹੀ। ਇਹਨਾਂ ਕਹਾਣੀਆਂ ਬਾਰੇ ਭਰਪੂਰ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਅੰਤ ਵਿਚ ਡਿਨਰ ਵਰਤਾਇਆ ਗਿਆ।

The post ਪੰਜਾਬੀ ਲਿਟਰੇਰੀ ਐਂਡ ਕਲਚਰਲ ਸੁਸਾਇਟੀ ਦੀ ਮੀਟਿੰਗ ਨਾਵਲਕਾਰ ਫ਼ਰਜ਼ੰਦ ਅਲੀ ਨੂੰ ਸਮੱਰਪਿਤ appeared first on Quomantry Amritsar Times.